Rhaglen o gyrsiau iaith ar gyfer ymarferwyr addysg yw’r Cynllun Sabothol sydd bellach wedi ei gartrefu yn y Ganolfan Dysgu Cymraeg Genedlaethol, a’i nod yw cynyddu nifer yr ymarferwyr sy’n gallu addysgu trwy gyfrwng y Gymraeg neu’n ddwyieithog yn ogystal ag uwch sgilio ymarferwyr o ran addysgeg caffael iaith a sut i drosglwyddo’r iaith yn effeithiol i ddysgwyr.
Mae Rhagoriaith yn un o dri darparwr y cyrsiau ac yn gwasanaethu rhanbarth eang sy’n cynnwys Sir Gâr, Sir Benfro, Ceredigion, Powys, Abertawe a Chastell Nedd Port Talbot.
Dyfyniad o gyn-fyfyriwr y Cwrs Sabothol;
"Pan ddecheuais i’r cwrs doeddwn i ddim yn gwybod pa mor anhygoel ydy’r iaith Gymraeg, ond yn gyflym cwympais i mewn cariad gyda'r iaith a dw i'n falch iawn fy mod i wedi cael y cyfle i fynd ar y cwrs. Ers gorffen y cwrs dw i wedi parhau i ddysgu ar gyrsiau eraill, ac ar hyn o bryd dw i ar gwrs uwch. Roedd y profiad yn anhygoel, mae gen i fwy o hyder ac mae'r plant yn yr ysgol yn mwynhau dysgu Cymraeg nawr. Baswn i'n argymell y cwrs i bawb!"
“Am gwrs anhygoel! Yn ystod fy 27 mlynedd o addysgu, nid wyf erioed wedi profi unrhyw beth mor effeithiol ar gyfer fy natblygiad proffesiynol parhaus. Yr unig beth dw i'n difaru yw peidio a gwneud yn gynt. Mae wedi rhoi’r offer i mi ffynnu yn y dosbarth ac mae wedi bod yn amhrisiadwy ar gyfer fy nhwf personol gyda’r Gymraeg.”
"Un o'r penderfyniadau gorau dwi wedi gwneud fel athro yw gwneud y Cwrs Sabothol Cymraeg! Mae gwybodaeth y tiwtoriaid heb ei hail, ac mae'r cwrs wedi'i strwythuro yn arbennig gyda chynnwys amrywiol a wnaeth gadw fy niddordeb drwy gydol y cwrs. Doedd y cwrs ddim yn unig yn canolbwyntio ar y Gymraeg ond hefyd yn gyfle i ddeall methodoleg addysgu a dysgu iaith. Mae'n hwyl, ymarferol, ac mae wedi agor cymaint o ddrysau i mi ddefnyddio'r Gymraeg yn hyderus y tu mewn a'r tu allan i'r ystafell ddosbarth. Alla i ddim ei argymell ddigon i athrawon eraill—mae'r cwrs hwn wir yn trawsnewid sut rydych chi'n addysgu ac yn cysylltu â'r iaith!"
Am fwy o wybodaeth am y llu o gyrsiau sydd ar gael i’r gweithlu addysg, ewch i wefan Dysgu Cymraeg.
