Sefydlwyd Rhagoriaith, Canolfan Gwasanaethau Cymraeg Prifysgol Cymru y Drindod Dewi Sant yn 2017 er mwyn datblygu, darparu ac arwain ar ddarpariaeth hyfforddiant iaith y Brifysgol yn fewnol i fyfyrwyr a staff, yn ogystal ag yn fasnachol ar lefel genedlaethol.
Mae’r Ganolfan wedi datblygu ac yn darparu cyrsiau dysgu iaith a chyrsiau gloywi iaith i fyfyrwyr ac aelodau staff y Brifysgol, ac mae ganddi rôl allweddol wrth ddarparu cyrsiau iaith i fyfyrwyr ar draws y Brifysgol. Mae’r Ganolfan hefyd yn gyfrifol am dair dystysgrif ôl-raddedig, sef Tystysgrif Cyfieithu ar y Pryd sy’n rhan o gynllun Meistr cenedlaethol, sef MA Astudiaethau Cyfieithu, tystysgrif ym maes Is-deitlo sef yr unig un o’i bath yng Nghymru trwy gyfrwng y Gymraeg. A'r Dystysgrif mewn Polisi a Chynllunio Iaith sy'n rhan o radd Meistr MA Dwyieithrwydd ac Amlieithrwydd.
Mae’r Ganolfan yn un o ddarparwyr y Cynllun Sabothol sydd bellach wedi ei gartrefu yn y Ganolfan Dysgu Cymraeg Genedlaethol. Darperir yn uniongyrchol i ymarferwyr addysg ar draws ardal eang Sir Gaerfyrddin, Sir Benfro, Ceredigion, Powys, Abertawe a Chastell Nedd Port Talbot. Mae dau diwtor y Gweithlu Addysg hefyd yn rhan o’r Ganolfan ac yn darparu cyrsiau wedi eu teilwra i ymarferwyr addysg yn Sir Gâr a Sir Benfro.
Yn atodol i hyn, mae’r Ganolfan yn cynnig llu o gyrsiau dysgu Cymraeg a hyfforddiant i ysgolion a chyrff allanol. Mae gennym gyrsiau ar ddatblygu sgiliau darllen a llythrennedd, cyrsiau gloywi iaith, cyrsiau ar addysgeg caffael iaith yn ogystal â chyrsiau ar ofynion y Safonau Iaith. Mae’r gwaith hwn yn cyfrannu’n strategol at agendâu strategol ar lefel genedlaethol mewn perthynas â Chynlluniau Strategol y Gymraeg mewn Addysg a’r Safonau Iaith ac mae hyn oll yn cyfrannu at y targed o gyrraedd miliwn o siaradwyr erbyn 2050.
Mae’r Ganolfan hefyd yn cyfrannu at brosiectau iaith perthnasol o dan arweiniad Peniarth. Mae’r rhain gan amlaf yn brosiectau comisiwn gan Adnodd a Llywodraeth Cymru ac yn cyfrannu’n uniongrychol at godi safonau llythrennedd a rhifedd ar draws y sector addysg yng Nghymru.
Mae arbenigeddau’r staff a’u profiad o ddysgu ar gyrsiau’r Sabothol yn golygu y gallant gynnig hyfforddiant o’r ansawdd uchaf. Gellid cynnig hyfforddiant iaith ar delerau masnachol i’r sector addysg yng Nghymru, boed y rheiny’n gyrsiau i’r sector addysg bellach neu’n gyrsiau HMS wedi’u teilwra, er mwyn ymateb i anghenion y sectorau cynradd ac uwchradd.